Occitan
Benvengut a l'Universitat Pompeu Fabra
Te convidam a nos conéisser succintament al mejan d'aquesta pagina e a consultar la version completa de nòstra web en anglés, en catalan o en castelhan se vòles conéisser mai a fons nòstra universitat. Esperam que l'informacion que t'ofrissèm aicí te facilitarà la coneissença de nòstra institucion.
L'Universitat Pompeu Fabra
L'Universitat Pompeu Fabra (UPF) es una institucion publica que foguèt creada en 1990 a Barcelona. Sos objectius son la formacion superiora de grad, post-grad e la recèrca. L'UPF se caracteriza per sa modernitat, son excelléncia, sa qualitat e son prestigi, e totes sos indicadors l'an convertida en una universitat de referéncia dins lo sistèma universitari de l'estat.
La comunitat universitària de l'UPF es constituïda per 15.000 estudiants, 1.500 professors e 600 trabalhadors. Lo campus de l'UPF se situa al centre de Barcelona.
Ensenhament e recèrca
L'activitat d'ensenhament e recèrca de l'UPF se centra suls domenis de coneissença seguenta:
- Sciéncias experimentalas e de la santat
- Sciéncias politicas e socialas
- Dreit
- Economia e entrepresas
- Umanitats
- Comunicacion
- Tecnologias de l'informacion e de las comunicacions
- Traduccion e filologia
L'UPF a una vasta ofèrta d'estudis de grad e de post-grad (mestratge e doctorat), que s'ensenhan en catalan, en castelhan e/o en anglés. L'UPF a ja implantat lo modèl d'ensenhament de l'Espaci Europèu d'Ensenhament Superior als seus estudis de grad (4 ans) e a la totalitat dels seus programas de mestratge (1 o 2 ans) e de doctorat (1 an + 3 ans per presentar la tèsi doctorala).
Per çò de la recèrca, l'UPF met al servici de las entrepresas e institucions una equipa multidisciplinària, formada d'un milièr d'investigadors extrèmament qualificats. L'UPF mena dos projèctes principals de recèrca: lo Parc de Recèrca Biomedicala de Barcelona e lo Parc de Recèrca UPF - Sciéncias Socialas e Umanitats, que son unas grandas infrastructuras de formacion, recèrca e produccion dins los domenis de la biomedecina, de la comunicacion e tecnologia e de las sciéncias socialas, respectivament.
Vocacion europèa e internacionala
La mobilitat dels estudiants de l'UPF e la mobilitat d'estudiants internacionals a l'UPF cap a, e a partir d'universitats prestigiosas del mond entièr; los acòrds de colaboracion amb mai de tres cents universitats de tot lo mond; l'incorporacion de professors e d'investigadors internacionals de primièr nivèl; la participacion activa en projèctes, rets e associacions internacionales, son unes exemples de la vocacion internacionala de nòstra universitat.
Rendiment e insercion laborala
Las altas taxas de rendament academic e d'insercion laborala situan l'UPF en una posicion privilegiada en çò que concernís la rèsta d'universitats publicas del sistèma universitari de l'estat.
Innovacion tecnologica
Lo melhorament de la qualitat via las nòvas tecnologias es un dels grands gatges de l'Universitat Pompeu Fabra. Actualament l'UPF es una de las principalas universitats de l'estat, en desplegament e aplicacion de las nòvas tecnologias de l'informacion e de la comunicacion, tant en l'entorn academic coma en l'administratiu.
Multilingüisme
L'UPF es una universitat multilingua. A l'UPF i convívon lo catalan -lenga pròpria e oficiala de l'Universitat-, lo castelhan -cooficial- e l'anglés. Aquestas lengas son las lengas utilizadas en comunicacion e trabalh academic per excelléncia.
Servicis de supòrt a l'estudiant internacional
Entre los servicis personalizats que l'UPF ofrís a l'estudiant internacional, cal remarcar l'Oficina de Mobilitat e Aculhiment. Aquesta oficina proporciona ajuda sobre questions academicas, practicas e legalas. S'adreça a totes los estudiants qu'arriban a l'UPF en provenença d'universitats forencas.
Los altres servicis pels estudiants internacionals: residéncias universitàrias, corses de catalan e de castilhan, lo programa d'idiòmas (anglés, francés, alemand, arab, chinés, japonés...), lo programa de volontariat (escambi) lingüistic, e lo programa d'estudis hispanics e europèus.